Curtas GZ en Pontevedra

Durante os días 5 e 6 de maio, organizado polo Comité Aberto da Facultade (CAF) da Facultade de Comunicación de Pontevedra, celebrarase un interesante encontro de creadores técnicos e promotores do mundo da curtametraxe na Galiza.

Curtas GZ comezou o ano pasado co obxectivo "dar a coñecer a xénese e evolución da curtametraxe na Galiza", pero tamén o de "revindicar a necesidade dun idioma propio como símbolo da vitalidade cultural do noso pais".

O programa deste ano recupera numerosas producións míticas dos 90 como Coruña Imposible, A repesca, O matachin, Grande Cuba ou Afonía, coa presenza activa dos seus actores, técnicos, productores e directores/as. Pero nas Xornadas pegaraselle tamén un repaso á produción "subvencionada", ao curtametraxismo documental, ás experiencias de autofinanciación ou curtas con productora....e mesmo chegan a incluir homaxes a traxectorias tan impresionantes no mundo da curta como a de Alber Ponte. Unha coidadase escolma de curtas actuais que comparten espazo con novas pezas elaboradas polos propios estudantes da Facultade.

En todos os casos, o debate de ideas e a discusión aberta será un dos leiv motivs de actividades tan imprescindibeis completas e interesantes coma Curtas GZ, xa que permite evidenciar a emerxencia dun mundo paralelo, rico en ideas e propostas no audiovisual galego.

Por alí andaremos o martes a iso das 10:00 contando algunha que outra historia e poñerei o que hai, ou o que queda máis ben, do MINIMO COMUN MULTIPLO.